تحدثت الفنانة جيهان سلامة عن تقديمها للأدوار الجريئة في بداية مشوارها الفني ورد فعل أسرتها على دورها في فيلم "لحم رخيص".
وقالت جيهان سلامة خلال لقائها في برنامج "ورقة بيضا" مع يمنى بدراوي: "أهلي اتخضوا لما شافوا دوري في فيلم "لحم رخيص" أختي الله يرحمها راحت تشوف الفيلم في أول يوم وأنا مكنتش مفهماهم الفيلم إيه وأنا مكنتش واخدة بالي أن الفيلم ممكن يصدم أي حد، أختي لما روحت لطمت كأني عامله مصيبة أنا كانت أول مرة أشوف الفكر دا، مفهمتش كلامها وموقفتش عند الآراء دي خالص، هي زعلت شوية".
وأوضحت جيهان سلامة سبب اتخاذها لقرار عدم تقديم أدوار جرئية وقالت: "أخدت القرار مش عشان خايفة من هجوم الناس، عشان أنا عايزة أعمل حاجات تانية مش عايزة اتحط في قالب معين".
وتابعت جيهان سلامة: "كان بيجيلي أدوار جريئة وكنت قبل ما أبدأ تصوير اتكلم مع المخرج وأقوله مش هقدر أعمل دا وكانوا بيستغربوا لأن الانطباع عني إني بقبل الأدوار الجريئة ولما أخدت قرار إن لأ مش هعمل قلتلهم هعرف أوصل اللي أنتوا عايزينه من غير قبلات أو أي مشاهد، بقيت بتكلم قبل ما أدخل أصور، في فيلم "بنتين من مصر" كان في مشهد جريء جدا اتكلمت مع أستاذ حمد أمين قبلها وقالي تمام ووقت التصوير تقريبا كان نسي ورفضت تاني والمشهد كان جرئ فعلا وأنا أصريت على موقفي".
وأكدت جيهان سلامة إنها مع الأفلام الجريئة التي تطرح أفكارا مختلفة وليس فقط التي تقدم مشاهد إغراء: " لازم يبقى في أفلام جريئة مش قضيتي حد من المشاهدين بيربط الجرأة بالإغراء ده موضوع يخصك أنا بشوف الجرأة في طرح الموضوع نفسه والأفكار ".
